గాడిద పాటు లీటర్‌కు రూ.1600 అంటా. ఇంత ఖరీదు ఉన్నాయంటే.. పోషకాలు దండిగా ఉంటాయి కావొచ్చు. పోషకాలు పక్కన పెడితే.. కాసులు మాత్రం గట్టిగానే వస్తాయి కదా. ఇదే ఆలోచనతో చాలా మంది గాడిద పాల వ్యాపారం వైపు మొగ్గు చూపుతున్నారు. కాగా.. మార్కెట్‌లో గాడిద పాటలకు వస్తున్న హైప్‌, రోజు రోజుకు పెరుగుతున్న డిమాండ్‌, వ్యాపారానికి మొగ్గు చూపుతుండటాన్ని ఆసరాగా తీసుకుని తమిళనాడుకు చెందిన ఓ ముఠా.. గాడిద పాల వ్యాపారం పేరుతో అమాయకులను గొర్రెలను చేసింది.
తమిళనాడుకు చెందిన బాబు ఉలగనాథం, గిరి సుందర్‌, సోనికా రెడ్డి, బాలాజీ, డాక్టర్‌ రమేష్‌ కుమార్‌ అనే ఐదుగురు 2022లో ముఠాగా ఏర్పడి డాంకీ ప్యాలెస్ పేరుతో ఓ సంస్థను ఏర్పాటు చేశారు. ఈ సంస్థ పేరుతో భారీ స్కామ్‌కు తెరలేపారు. వందలాది మంది రైతులను నిలువునా ముంచేశారు. డాంకీ ప్యాలెస్ పేరుతో ఫ్రాంచైజీలు అని.. గాడిద పాలు లీటర్‌కు రూ.1600 అని.. లక్షల్లోనే ఆదాయం వస్తుందని.. నమ్మించి గాడిదలను రైతులకు అంటగట్టి ఏకంగా 100 కోట్ల రూపాయలతో జెండా ఎత్తేశారంటూ.. ఓ భారీ కుంభకోణం తెరపైకి వచ్చింది. ఇది కేవలం తెలంగాణలోనే కాదు.. ఏపీ, తమిళనాడు, కర్నాటక, మహారాష్ట్ర లాంటి రాష్ట్రాల్లోనూ ఈ ముఠాకు రైతులు బకరాలయ్యారంటా.
ఈ డాంకీ ప్యాలెస్ పేరుతో ప్రాంచైజీ తరహాలో ఒక్కో పాడి గాడిదను రూ.80 వేల నుంచి 1.50 లక్షల రూపాయల చొప్పున రైతులకు అమ్మారు. అంతే కాదు.. సెక్యూరిటీ డిపాజిట్ కింద ఒక్కో రైతు నుంచి రూ.5 లక్షలు వసూలు చేశారు. గాడిదల నుంచి ఉత్పత్తి చేసిన పాలు లీటరు రూ.1600 చొప్పున తామే సేకరిస్తామని కూడా ఒప్పందం చేసుకున్నారని.. 3 నెలల పాటు నమ్మకం కలిగించేలా నగదు కూడా చెల్లించినట్టు చెప్పుకొచ్చారు. ఇక నాలుగో నెల నుంచి.. నిర్వహణ ఖర్చులు, షెడ్ నిర్మాణం, సిబ్బంది జీతాలు, వెటర్నరీ చికిత్స ఖర్చులు ఇలా ఏదీ ఇవ్వకపోవటంతో.. రైతులంతా కలిసి ప్రశ్నించారు.
అయితే.. ఇలా తెలంగాణతో పాటు ఆంధ్రప్రదేశ్, తమిళనాడు, కర్ణాటక రాష్ట్రాల్లో ఏకంగా 400 మందికి పైగా రైతులు బాధితులుండగా.. కేవలం తెలుగు రాష్ట్రాల్లోనే 100కు పైగా రైతులు.. ఇక్కడే రూ.100 కోట్ల దోపిడి జరిగినట్టు.. చెప్తున్నారు. ఇదొక పెద్ద కుంభకోణమని, దీని వెనుక రాజకీయంగా పెద్దల హస్తం ఉండవచ్చంటూ బాధిత రైతులు సంచలన ఆరోపణలు చేస్తున్నారు. ఇదే విషయంపై చెన్నైలో పోలీస్ స్టేషన్‌లో ఫిర్యాదు చేయడానికి వెళ్తే పోలీసులు పట్టించుకోలేదని ఆవేదన వ్యక్తం చేశారు. ఈ ఒప్పందంలో ఇచ్చిన జీఎస్‌టీ సంఖ్య, ఎఫ్‌ఎస్‌ఎస్‌ఏఐ లైసెన్స్ కూడా నకిలీవేనని తర్వాత తేలిందని చెప్పుకొచ్చారు.
ఒక్కో రైతు 30 నుంచి 50 గాడిదలను కొనుగోలు చేశారు. అంటే సుమారుగా రూ.30 లక్షల నుంచి 50 లక్షల దాకా పెట్టుబడి పెట్టారు. పైసా రాకపోగా, ఇప్పుడు గాడిదల పోషణ భారం కూడా తమ మీదే పడిందని బాధితులు వాపోతున్నారు. పైగా.. ఫ్రాంచైజీ కోసం ఒక్కొక్కరి నుంచి రూ.5 లక్షలు వసూలు చేశారని.. గాడిదల పోషణ, పాలు పితకడం గురించి క్లాసుల పేరుతో మరో రూ.50 వేలు వసూలు చేసినట్టు బాధితులు చెప్తున్నారు.
ఇప్పటికే పెద్ద ఎత్తున తెచ్చిన అప్పులు, వడ్డీలు భారంగా మారాయని, కుటుంబ సభ్యుల వైద్యం, పిల్లల చదువుకు కూడా డబ్బులు లేవని తక్షణమే తెలుగు రాష్ట్రాల సీఎంలు ప్రత్యేక చొరవ తీసుకుని తమకు న్యాయం చేయాలని కోరారు. లేనిపక్షంలో తమకు ఆత్మహత్యలే శరణ్యమంటూ బాధితులు ఆందోళన వ్యక్తం చేశారు.
"అత్యాసకు వెళ్లి దయచేసి జీవితాలని ఆగం చేసుకోకండి, ఎందుకు అంటే మనకి ఉన్నది ఒకటే జీవితం"
F
